Tri-tra-trallala

He-La 06

Fotos vom Herbstlager 06

Samstag, 30.9.06

Da mir bi dä Areis uf Andwil vo Lachä us 4 mal hetted müssä umstiigä, händ mir dänkt, mir besammled üs doch in Pfäffikä, was mir dänn au gmacht händ und zämä mit em Chasperli händ mir vo det us üsi abentürlich Reis gstarted. Nach dä langä und ufregendä Fahrt, sind mir no es churzes Stuck z’Fuess gangä bis mir ändlich i üsem schönä (und echli chlinä) Chasperlihuus acho sind. Mir händ üs dänn mit dä Umgebig, am Chasperli sinä Fründä und dä Lagerreglä vertraut gmacht und gli drufabä sin mir au scho is Bett gangä (was nöd heisst, das alli Chind au sofort gschlafä händ…)

 

Sonntag, 1.10.06

Früäh am Morgä hät üs am Pi sini „Chistä“ unsanft gweckt, und als wär das nöd scho gnueg händ mir au gmerkt, dass üsäs Huus so leer und trist usgseht. Das händ mir natürlich müssä veränderä und darum händ mir üs praktisch dä ganz Tag mit Scher, Papier, Schnuär und ähnlichem beschäftiget, so dass am Schluss es wunderschöns Theaterhuus entstandä isch.

 

Montag, 2.10.06

Will mir und vorallem d’Chind nöd so recht Luscht uf en stundälangi Wanderig gha hend, sind mir mit em Schorsch Gaggo und dä Susu churzerhand in Walterzoo  gange. Det hät’s vill z’besichtigä gäh: Affe, Geissä, tüpfleti Ross, Kängurus, usw. Nachdem mer dä ganz Zoo aglueget händ, händ mer natürlich Hunger übercho und üsi Chuchi isch so nett gsi und hät üs z’Ässä direkt in Zoo bracht.

S’Highlight vom Tag isch aber ganz sicher dä Pippi Langstrumpf Zirkus gsi, wo mer go luegä sind.

 

Dienstag, 3.10.06

A dem Tag hämmer mit em Chasperli im tüüfä Wald nach dä siebä Wunderchrütli gsuecht. Wo mir diä ändlich erfolgriich gfundä gha händ, simmer hei und händ dä Chasperli klont , damit jedes Wölfli sini eignig Figur gha hät. Natürlich sind a dem Tag dänn au diä hübschä Lagerabzeichä entstandä. Am Abig hämmer dänn Chartä gschriebä und nach dem langä Tag sind mir todmüed is Bett gfallä.

 

Mittwoch, 4.10.06

Am Mittwuch händ alli Leiter plötzlich so dicki Büüch gha und händ wiä richtigi „Dickseck“ usgseh. Zum dem Ganzä Abhilf z’verschaffä, händ mir üs verrussä müssä sportlich betätigä und alli üsi Süessigkeitä dä Wölfli abgäh, damit mir wieder chli dünner werded. Gäg dä Abig sind mer nochli am Füür gsässä und händ gsungä. I dä Nacht sind d’Wölf zuäfälligerwiis vo zwei nachtwandelndä Chasperlifründä gweckt wordä, und da sie scho mal wach gsi sind, händ mer dänkt mir gönd grad nochli verusä mit ihnä…

 

Donnerstag, 5.10.06

A dem Tag sind mir nach därä ufregendä Nacht verständlicherwiis chli später ufgstandä und händ üs vo dä Chuchi en feinä Brunch servierä lah.

Am Namittag händ mir üsäs Chönnä bi verschiednigä Disziplinä under Bewiis gstellt. Zum Biispiil händ mir idä Duschi mit Wasserballön dä Chasperli müssä abäschüssä und so üsi Treffsicherheit teschtä. Am Abig händ mir diä letschtä Postchartä gschriebä, s’Wölfliversprächä gmacht  und sind dänn chli später als plant is Bett.

 

Freitag, 6.10.06

Am Friitig sind mer alli chli dräckig gsi und drum sind mir mit em Chasperli go de Muschelschatz im Meer go suechä. Nachdem alli Wölfli wieder suuber gsi sind, simmer wieder zum Theaterhuus zrugg und händ zum Abschied no es grosses Dankeschöns-Fäscht für dä Chasperli und sini Fründä gäh.

 

Samstag, 7.10.06

Am Samstig isch diä schön Wuchä leider scho wieder verbii gsi, so dass mir no schnells Huus butzt, bevor mir üs wieder uf dä Heiweg nach Pfäffikä gmacht händ. Det acho händ mir üsi Elertä mit emä fröhlichä tri-tra-trallala begrüesst  und üs vom Chasperli verabschiedet. Diä Wuchä ird üs allnä sicher no lang in Erinnerig bliibä.

 

Mis Bescht, Theia