Aladdin und die Wunderlampe

Pfi-La 07 - Wölfe Obermarch

Am Friitig am 25. Mai händ mir üs in Buttikä uf em Chiläplatz mit em Aladdin und sinä Fründä troffä zum mitänand es schöns Pfingstwuchänänd im Orient zverbringä. In Buttikä händ mir dänn aber zersch mal üsi Velos i flüügendi Teppich verwandlet, dänn schliesslich isch es en wiitä Wäg bis in Orient und mit dä Velos wär das vill z’astrengend gsi. Det acho händ mir üs mit em Aladdin sinerä Kultur vertraut gmacht. Mir händ Buchtanzä glernt, «Kuch Kuch hot hai» bachä, orientalischi Sitzchüssi baschtlet und Musig gmacht.

Am Samstig morgä isch dänn aber öpis Schrecklichs passiert. Üsi Prinzessin Jasmin isch entfüehrt wordä. Voller Sorg händ sich natürlich alli grad uf dä Wäg gmacht zum sie wieder zgfindä. Mit em Dschini sinä Chräft und dä tatchräfigä Understützig vo dä Wölf händ mir sie dänn zum Glück au gli druf abä imä Huus am Dorfändi wieder gfundä. Alli sind glücklich gsi und händ d’Rückcher vo dä Jasmin welä fiirä und drum sind mer am Namitag ines Schwümmbad gangä.

Idä Nacht vom Samstig uf dä Sunntig isch dänn aber scho wieder öpis passiert. Dä Dschafar hät nämlich d’Wölf gweckt und sie ine Höhli gfüert damit sie det en Ufgab erfülled. Hetted sie das nid gschafft, wäred sie für immer verbannt gsi.

Zum Glück händ das alli Chind gschafft, und drum sind am Sunntig au immer no alli heil under üs gsi. Nachem Zmorgä händ mir üs as Ufrumä gmacht, und dänn hät dä Aladdin d’Wölf no bi Tagesliecht i die gfürchigi Höhli gfüehrt. Schliesslich händ mir no es feins Zmittag gässä und dänn häts leider scho wieder Abschied nä gheissä. Mir sind uf üsi flüügendä Teppich gsässä und hei gflogä.

A derä Stell no es herzlichs Dankeschön a üsäs Chuchiteam (und as Wätter, wo trotz schlächtem Wetterbricht erstuunlich guet gsi isch)

Theia